Tuesday November 19 2019

HASHURJA E BEKTASHINJVE, PERSE DHE SI TA PERGATISNI

Hashurja është një recetë e vjetër, e përdorur kryesisht në jugun e vendit, por e njohur kudo në Shqipëri dhe më gjerë. Hashurja lidhet në mënyrë të drejtpërdrejtë me bektashinjtë, të cilët kanë edhe një ditë të dedikuar asaj: Dita e Hashures. Dy herë në vit e përgatisin bektashinjtë këtë ëmbëlsirë, në Ditën e Hashures dhe në Ditën e Nevruzit me 22 mars.

Fjala “hashure” vjen nga fjala arabe “ashr” që do të thotë “dhjetë”. Sipas besimtarëve, në këtë ditë kanë ndodhur shumë gjëra të mira për islamin. Për të gjithë, besimtarë ose jo, ne propozojmë këtë recetë që të gjitha gjyshet dhe nënat e dinë.

Sipas gojëdhënave, sa më shumë përbërës t’i hedhim, aq më e shijshme dhe e lidhur del hashurja jonë. Meqë përbërësit zihen secili veçmas, kërkohet durim dhe kohë. Por gjithsesi, nëse doni t’i bini më për shkurt, atëherë reduktoni përbërësit me ato që ju ndodhen, por duke u kujdesur që gruri, arrat, lajthitë, kanella dhe sheqeri duhet të jenë patjetër.

HASHURE

Kohëzgjatja: 10 orë zbutja e produkteve në ujë, 2 orë zierja
Përbërësit: për 6-8 persona

1 & 1/2 filxhan grurë
1/2 filxhan oriz ose qiqra
1/2 filxhan arra
1/2 filxhan lajthi
1/2 filxhan bajame të pjekura
1/2 filxhan rrush i thatë
1/2 mollë ( sipas dëshirës)
1/2 ftua (sipas dëshirës)
1 filxhan pekmez ose 1 filxhan e sheqer (i shtoni sipas dëshirës)
3-4 fiq të thatë
3-4 kajsi të thata (sipas dëshirës)
1 shkop kanelle

PERGATITJA

1. Një natë përpara fusni në ujë grurin dhe qiqrat (nëse doni t’i përdorni) që të zbuten, secili në enë të veçantë. Gjithashtu fusni në ujë rrushin e thatë, kajsitë, fiqtë (veçmas) që të ngopen me ujë, meqë janë fruta të thata dhe i lini për të gjithë natën.

2. Të nesërmen kulloni ujin e të gjithave dhe filloni përgatitjen. Zieni grurin në zjarr të ngadaltë duke e përzier vazhdimisht. Kujdes mos ngjitet, duhet llogaritur uji, rreth 2 litër janë të mjaftueshme. Po kështu veprojmë për qiqrat dhe orizin. (Orizin e ziejmë në ujë të valuar).

3. Marrim gjysëm molle dhe gjysëm ftoi dhe mbi tulin e tyre ngulim rrënjët e karajfilit. I vëmë të ziejnë për pak kohë me ujë dhe i heqim mënjanë që të ftohen. Kjo ishte pjesa përgatitore. Tani jeni gati për fazën finale.

4. Në një kusi, bashkoni drithërat e zier dhe të kulluar nga uji i zierjes, frutat e thata që më parë i keni zbutur në ujë dhe më pas i keni ndarë në copa, shtoni ujë të pastër, kanellën, sheqerin ose pekmezin, arrat, lajthitë, bajamet dhe pak kripë. I lini të ziejnë në zjarr të ngadaltë, duke i përzier vazhdimisht deri sa të nisë trashja e lëngut dhe të bëhet një masë viskoze.

5. Nëse nuk arrini të realizoni trashjen e lëngut, atëherë mund të përdorni 2 lugë gjelle niseshte, ta shkrini më parë me ujë të ftohtë dhe t’ia shtoni masës që zien në kusi duke e përzier vazhdimisht. Kontrolloni sheqerin edhe një herë para se ta hiqni nga zjarri.

6. E ndani nëpër tasa, filxhanë çaji dekorativë, kupa qelqi, sipas dëshirës. Dhe sipër e zbukuroni me mollën dhe ftoin të prerë në kubikë të vegjël, bajame, lajthi, rrush të thatë, boronica dhe kokrra shege. E spërkasni me kanellë dhe ja ku jeni gati të festoni: Gezuar Festën!

Share this:
Tags:

Add Comment

one × 4 =

This site uses Akismet to reduce spam. Learn how your comment data is processed.